Dr Günter... a Schand firs Schwobaländle?

Do henn se sich also widr droffa, dr Eugen on dr Hugo. "Jetzat solle mr au no Englisch lerna, moint der Günter. Ha dees isch oiner. Der kos jo selber net!" - So hot dr Eugen ogfanga. "Ha deshalb hennsen jo au noch Brissel gschickt!", hot der Hugo dann gsagt. "Aha, jo, kennt scho sei", hot dr Eugen gmoint. "Aber sag emol, welche Heggebeerlesbronser henn dem Günter aigentlich dia domme Zeddel gschrieba?" - "Des waret seine schlaue Berater, die älle sälber koi Englisch kennat." Jo, dr Hugo woiß Bscheid. "Dia folgat dem Motto 'mir kennet älles, bloss koi Hochdeitsch'. On Englisch schomol gar net."
"We are all sitting in one boat... was hoißt denn dees?", hot der Eugen gfrogt. "Mir sitzat älle im gleicha Kahn." - "Ach, der Olli..." - 'Noi, der doch net. Bootle...". "On i han emmer dengt, 'bottle' hoißt soviel wia 'Fläschle'." - "Do kosch Recht han, Eugen, do waret scho a baar Fläschle onderwägs..." - "Beim Lothar hätts des net gäbba...", hot der Eugen dann sagt."Matthäus?" - "Noi, ach egal. Scho z'schpäth..." - Mr kennt scho moina, em Schwobaländle gilt dr Schbruch: 'gugge rom, gugge nom, laudr Domme omme rom'. Aber des stemmt natirlich net. There are you mighty on the woodway! Abr vielleicht schwätzt dr nägschde Kommissar jo au Latein. Errare humanum ätsch. Friher hättet se gsagt: Kohl lucet omnibus. Abr wona dees heit fiart... des werdet älle schono merkla...